En 1096, en Alcoraz, amán de Uesca, as tropas d'o rei Sancho Remiriz d'Aragón yeran asitiando a ciudat. Os musulmans que yeran en Uesca recibieron aduya de más tropas que i plegoron dende Zaragoza y consiguioron matar a lo rei, pero perdioron a batalla d'Alcoraz, seguntes a falordia, grazias a l'aparizión de Sant Chorche. Más tardi o rei Pero I d'Aragón conquistó Uesca invocando l'aduya d'o santo.
Sobre tot dende o sieglo XIII surten numerosas falordias y aparizions en o reino. Asinas Chaime I o Conqueridor cuenta que en a conquista de Valencia apareixió o santo.
O patronache de Sant Chorche sobre os reis d'Aragón y sobre toda a Corona d'Aragón se reconoixe ofizialment en o sieglo XV con la creyación d'una festividat.
Un sieglo dimpués, en as Cortz de Monzón de 1564 se confirma o fuero establindo una pinyora de sixanta sueldos chaqueses ta qui no guarde a dita fiesta.
Dimpués de l'abolizión d'os fueros, no ye dica o 10 d'abril de 1978, un día dimpués d'a constituzión d'a Deputazión Cheneral d'Aragón como instituzión preautonomica, cuan os suyos consellers apreban, por unanimidat, declarar o 23 d'abril como Día d'Aragón. Finalment, a festividat de Sant Chorche como Día d'Aragón prene o ran de Lai o 16 d'abril de 1984, en que se declara a calendata d'o 23 d'abril festivo en tot Aragón.
La información ha sido extraída de:
